नाम व नामाचे प्रकार.Noun And Its Types.

 नाम व नामाचे प्रकार.Noun And Its Types.

nam-va-namache-prakar

 

नाम :- प्रत्यक्षात असणाऱ्या किंवा कल्पनेने जाणवलेल्या वस्तूंना किंवा त्यांच्या गुणधर्मांना दिलेल्या नावाला 'नाम' असे म्हणतात.

उदा. गाडी,पेन,टेबल,राग,सौंदर्य,साखर इत्यादी  

नामाचे प्रकार

मराठीत नामाचे मुख्य ३ प्रकार पडतात.

१. सामान्यनाम 

२. विशेषनाम 

३. भाववाचक नाम

१. सामान्यनाम :-एकाच गटातील प्रत्येक वस्तूला समान गुणधर्मामुळे जे एकच नाम दिले जाते त्यास 'सामान्यनाम' असे म्हणतात.सामान्यनामाचे अनेकवचन होते.

उदा.शाळा,पाणी,ग्रह,तारा,माणूस इत्यादी

सामान्यनामाचे खालील दोन प्रकार पडतात. 

अ.पदार्थवाचक नाम    ब.समूहवाचक नाम

अ.पदार्थवाचक नाम:-जे घटक शक्यतो लिटर,मीटर किंवा कि. ग्रॅममध्ये मोजले जातात/संख्येत मोजले जात नाहीत त्या घटकांच्या नावाला 'पदार्थवाचक नामे' असे म्हणतात.

उदा.सोने,कापड,मीठ,पाणी,प्लास्टिक,तांबे इत्यादी

ब.समूहवाचक नाम :- समान गुणधर्म असणाऱ्या अनेक घटकांच्या एकत्रित समूहाला दिलेल्या नावाला'समूहवाचक नाम'असे म्हणतात.

उदा.ढिगारा,जुडी,गंज,मोळी इत्यादी

२. विशेषनाम :- ज्या नामाने जातीचा बोध होत नसून त्या जातीतील एका विशिष्ट व्यक्तीचा,वस्तूचा किंवा प्राण्याचा बोध होतो त्यास'विशेषनाम'असे म्हणतात.

विशेषनाम हे व्यक्तिवाचक असते.

उदा. आशा,दिल्ली,गोदावरी,भारत,सूर्य इत्यादी

३. भाववाचक नाम :- ज्या नामाने प्राणी किंवा वस्तू यांच्यामध्ये असलेल्या गुण,धर्म किंवा भाव यांचा बोध होतो त्याला'भाववाचक नाम' असे म्हणतात.

उदा. आनंद,सौंदर्य,गुलामगिरी,विश्रांती,श्रीमंती,इत्यादी

भाववाचक नामाचे तीन गट पडतात.

अ.स्थितीदर्शक  - जसे-गरिबी,हुशारी 

ब. गुणदर्शक - जसे-सौंदर्य,प्रामाणिकपणा 

क. कृतिदर्शक - जसे-चोरी,चळवळ

नाम व त्याचे प्रकार याची  Pdf File डाउनलोड करण्यासाठी येथे क्लिक करा.